Ես թե՛ ներքաղաքական, թե՛ արտաքին քաղաքական գործընթացները պատկերացնում եմ որպես քաղաքական գործընթացներ։ Այսինքն դու ունես ծրագիր, սկզբունք, նպատակադրումներ, եւ եթե դու հետեւողականորեն առաջնորդվում ես դրանով, ինքնին ստեղծում ես քաղաքական գործընթաց՝ քո համախոհներով, քո աջակիցներով։ 

Դոկտոր Աշոտ Եղիազարյան, ՄԱՀՀԻ ասոցացված փորձագետ Դոկտոր Աշոտ Եղիազարյան, ՄԱՀՀԻ ասոցացված փորձագետ

«Ազատ դեմոկրատներ» կուսակցության ցուցակում ընդգրկված եւ ռեյտինգային ընտրակարգով առաջադրված թեկնածու Աշոտ Եղիազարյանը, ով տնտեսագիտության դոկտոր է, դասախոսում է Տնտեսագիտական համալսարանում, շուրջ 25 տարի ՀՅԴ-ին անդամակցելուց հետո դուրս է եկել մենշեւիկ «կարմիրների» շարքերից, քանզի իր եւ ՀՅԴ-ի միջեւ հակասություններ են առաջացել արտաքին քաղաքականության հարցերում։ Խոսքը, մասնավորապես, ԵԱՏՄ-ին Հայաստանի անդամակցության մասին է, որին դեմ է արեւմտյան ուղղությանը հարող Եղիազարյանը, բայց կողմ էին դաշնակցականները։ Այժմ նա «ԱԴ»-ի ցուցակում ընդգրկված է որպես անկուսակցական։

«Ազատ դեմոկրատների» ցուցակով առաջադրվելու առաջարկ ստացել է կուսակցության նախագահ Խաչատուր Քոքոբելյանից, ընդունել է այն, քանզի իր՝ պրոարեւմտյան դիրքորոշումը պաշտպանող միակ ուժն «Ազատ դեմոկրատներն» է։ Ի դեպ, «Ազատ դեմոկրատները» միակ քաղաքական ուժն է 9 ուժերից, որ ի սկզբանե հռչակել է իր վարչապետի թեկնածուի անունը․ եթե գան իշխանության՝ Հրանտ Բագրատյանն է լինելու։

- Բայց «Ազատ դեմոկրատներից» բացի այլ ուժեր եւս արեւմտամետ դիրքորոշում ունեն, օրինակ՝ «Լուսավոր Հայաստանը» կամ «Ժառանգությունը»։

- Գիտե՞ք ինչ կա, մի բան է խոսել եւ այլն, մի բան է՝ ծրագրային ամրագրել, նախաձեռնությամբ հանդես գալ, հստակ ասել, որ մեր տեղը ԵԱՏՄ-ում չէ։ Էդպես հստակ միայն «Ազատ դեմոկրատներն» են ասում, գիտեք, որ Խաչատուր Քոքոբելյանն էլ այդպիսի նախագիծ ներկայացրել է։

- Իսկ ներքաղաքական առումով Ձեր հայացքները համընկնո՞ւմ են «Ազատ դեմոկրատների» բռնած կուրսի հետ։ - Ի՞նչ նկատի ունեք՝ ներքաղաքական, խոսքը գաղափարախոսությա՞նն է վերաբերում։

Ես թե՛ ներքաղաքական, թե՛ արտաքին քաղաքական գոծընթացները պատկերացնում եմ որպես քաղաքական գործընթացներ։ Այսինքն՝ դու ունես ծրագիր, դու ունես սկզբունք, նպատակադրումներ եւ եթե դու հետեւողականորեն առաջնորդվում ես դրանով, դու ինքնին ստեղծում ես արդեն քաղաքական գործընթաց՝ քո համախոհներով, քո աջակիցներով։ Օրինակ, մեզ մոտ բիզնես շերտ կա, որ, իհարկե, վերջին տարիներին բավականաչափ ճնշվեց, փոքրացավ, որոնք իսկապես ստեղծագործ մարդիկ են, ձեռնարկատիրական ջիղ ունեն։ Մենք եթե լավ ներկայացնենք մեր մոտեցումները, որ իրենց տնտեսական գործունեության ընդլայնումը հնարավոր է միայն ընդհանուր եվրոպական տարածքին մաս կազմելու միջոցով, կարծում եմ՝ նրանք իրենց շահերը լավ էլ կհասկանան։

- Ընդդիմադիր ուժեր կան, որոնք ժամանակին, օրինակ, ինչ-որ «ռեժիմի» կամ Սերժ Սարգսյանի դեմ էին պայքարում, փորձում էին իշխանափոխության հասնել, հիմա քաղաքական ուժ կամ ուժեր կան, որոնք պայքարում են խորհրդարան անցնելու համար։ Ձեր պայքարի թիրախը ո՞րն է, Դուք այսօր իշխանափոխության ձգտո՞ւմ եք։

- Ցանկացած քաղաքական ուժ էլ, բնական է՝ նաեւ մենք, պիտի փորձենք անել այն առավելագույնը, եւ մենք ունենք էդ տեսլականը, ի տարբերութուն շատերի, եւ մենք պատրաստ ենք, հանձնառու ենք նաեւ կառավարություն ձեւավորել։ Իսկ պայքարի թիրախ, այսինքն՝ ինչ-որ մեկի դե՞մ․․․ Չէ, մեր մոտեցումը շատ պոզիտիվ է, մենք ներկայացնում ենք եւ պիտի փորձենք ներկայացնել այն, ինչին մենք հավակնում ենք, եւ այն, ինչին հավատում ենք, համոզված ենք եւ աշխատում ենք էդ ուղղությամբ։ Այս նախընտրական պայքարի ընթացքում մեր խնդիրը դառնում է պարզապես լավագույնս ներկայացնել այդ ամենը։

- Դուք Կոտայքի մարզում առաջադրվել եք ռեյտինգային ընտրակարգով։ Ինչպե՞ս եք պատկերացնում Ձեր պայքարը մի տարածքում, որտեղ լուրջ ռեսուրսներ են կենտրոնացրել ՀՀԿ-ն ու «Ծառուկյան դաշինքը»։

- Էնպես չէ, թե ես իրականությունը չեմ պատկերացնում, ես միշտ փորձել եմ իրականության հետ կապված՝ ադեկվատ լինել։ Իմ խնդիրն է՝ լավագույն ձեւով ներկայացնել մեր մոտեցումները, թե ինչպես ենք պատկերացնում, եւ որքան ընկալելի լինենք, վստահ եմ, մենք կստանանք մեր համապատասխան քվեն։

- Մեր հասարակության մեջ, իհարկե, կան շերտեր, որոնք գնահատում են ինտելեկտն ու խելքը, բայց կան նաեւ շերտեր, որ գնահատում են փողը, լավությունը կամ, ասենք, սուր ընդդիմադիր ելույթներ ունենալը։ Դուք այս հատվածին ինչպե՞ս եք համոզելու՝ գնահատել Ձեր ծրագիրն ու դառնալ Ձեր ընտրողը։ Թույլ չի՞ լինի Ձեր գործիքակազմը։

- Դե, կփորձենք եւ կունենանք էն, ինչ կունենանք, իհարկե։ Իսկ Դուք ո՞նց եք պատկերացնում քաղաքական գործընթացը։ Մնացածը, ես կարծում եմ, քաղաքական գործընթացներից դուրս գործընթացներ են․․․

- Որոնք միշտ հաղթել են իրական քաղաքականությանը, ինչի արդյունքում Ձեզ պես քաղաքական ուժերն ու գործիչները պարտվել են։

- Դրա արդյունքում մենք կորցնում ենք քաղաքական դասը, մենք քաղաքական գործիչներ չունենք։

- Դրա դեմ պայքարելու նոր մոտեցում ունե՞ք մշակած։

- Մենք դրա դեմ չենք պայքարելու, մենք կներկայացնենք մեր մոտեցումները։ Անօրինական գործունեության դեմ մենք, իհարկե, համապատասխան մոտեցումները ցույց կտանք, դա բնական է։

- Այդուհանդերձ, ի՞նչ եք կարծում, շանս ունե՞ք գոնե նվազագույն շեմը հաղթահարելու եւ խորհրդարան անցնելու։ - Կարծում եմ՝ ավելիի շանս ունենք։ Մենք կարծում ենք՝ ապագան մերն է։

Վահե Մակարյան

03.03.2017

Աղբյուրը՝ «Հրապարակ»